Советот на Општина Делчево денеска ја одржа 54 Седница на која се разгледуваа 26 предлог-одлуки.
Советниците го усвоија Кварталниот извештај за првиот квартал од 2021 г кој е со реализација од 26%, односно од вкупно планираните приходи во висина од 328.158.656 ден., за првиот квартал се реализирани 84.910.035 денари. Од нив во Основниот буџет се реализирани 33,6%, во Буџетот на дотации се реализирани 22,7%, во Буџетот на донации се реализирани 7% и во Буџетот на самофинансирачки активности се реализирани 10,5%. Даночните приходи се наплатени во износ од 10.323.282 ден. од вкупно планирани 39.025.000 ден. или26,4%; Капиталните приходи се наплатени во износ од 651.249 ден. од вкупно планирани 4.905.000 ден. или 13,3%. Вкупните расходи се планирани во износ од 328.158.656 денари. Од нив се реализирани 80.495.696 или 24,5%. Во Основниот буџет од вкупно планирани 117.293.456 ден. реализирани се 36.754.785 или 31,3%.
На Седницата се усвоени одлуки кои се однесуваат на: Програмата за градби кои не се предвидени со урбанистички план, односно урбанистичка документација-Отворено спортско игралиште- Скејт парк на дел од к.п. бр.8647/1 КО Делчево; Одлуки со кои се врши одобрување на доставени допопнителни графички прикази за фонтана бр.1 на К.П. бр. 6682/1 КО Делчево и фонтана бр. 2 на К.П. 6683 КО Делчево согласно одредбата предвидена во Програмата за поставување на урбана опрема на територијата на град Делчево.
Советот ги верификуваше и мандатите на членовите на Локалниот младински совет на Општина Делчево:
- Александар Дончовски, Планинарски спортски клуб „Голак“, Делчево
- Јована Петровска, ЛК СДММ Делчево
- Кристијан Трајановски, НУЦК „Никола Јонков Вапцаров“, Делчево
- Родна Деолска, Регионален центар за застапување, Делчево
- Џастин Мемедов, НВО „КХАМ“, Делчево.
Исто така, на денешната Седница, советниците ги усвоија „Профилот и Стратегија за Локален економски развој“ на Општина Делчево за периодот 2021-2025 во која се опфатени 10 стратешки области на делување: инфраструктура, животна средина, образование, култура, туризам, економија, здравство и социјала, спорт и рекреација и јакнење на внатрешните капацитети на ЕЛС и рурален развој.
Меѓу другите точки од Дневниот ред, советниците ја поддржаа и Одлуката за кофинансирање проекти од граѓански организации кои ќе се финансираат преку јавните повици организирани во рамките на ReLOaD2. ReLOaD2 ќе се спроведува во 7 партнерски општини кои ќе бидат избрани преку конкурентен процес, и фокусот ќе се стави на институционализација на интеракцијата помеѓу општините и ГОи. Партнерските општини ќе се поттикнат да финансираат проекти на ГОи преку јавни повици, на транспарентен и развојно ориентиран начин, препознавајќи ги локалните потреби. Исто така, со проектот ќе се унапредува младинскиот ангажман и ќе се поддржува спроведувањето на младински иницијативи а воедно ќе се работи и на подобрување на нивните економски перспективи во партнерските општинни.
Делчевските советници ја донесоа Одлуката за определување места за истакнување изборни плакати во Општина Делчево; Одлуката за давање позитивно мислење на Статутарната Одлука за измена и дополнување на Статутот на ООУ „Св.Климент Охридски“-Делчево; Одлуки за давање согласност за формирање паралелки со помал број ученици на трите образовни институции и годишните планови за вработување за 2022 г на ООУ „Ванчо Прке“, ООУ „Св.Климент Охридски“, ЈЛБ „Илинден“; Измени на Годишниот план за вработување на ЈКП „Брегалница“ за 2021 г.; Одлука за изменување на Одлуката за организација, делокругот и начинот на извршувањето на задачите на општинската администрација на Општина Делчево и Годишен план за вработување на Општина Делчево за 2022 година;
Советниците дадоа позитивен одговор и за Одлуката за изменување, дополнување, усогласување со Законот за рамномерен регионален развој на Одлуката за основање на Центар за развој на Источниот плански регион; Одлука за одобрување приоритетен објект по Проектот „Поврзување локални патишта“ финансиран со заем од Меѓународната банка за обнова и развој – Светска Банка.