Денеска започнаа градежните работи за санација на кровната конструкција на спомен-домот „Разловечко востание“. Работите ги изведува фирмата СТИЛ КОНСТРАКШАН од Прилеп, а треба да завршат за 30 дена.
По тој повод и во чест на 145 години од Разловечкото востание, во посета на Разловци и на увид на стартот на работите беше и националниот координатор за интеркултуризам едно општество, развој на културата и меѓуресорска соработка при Владата на РСМ, Роберт Алаѓозовски кој изрази задоволство што започнува санација на корвот на објектот кој е легендарен колку што е легендарно и самото село Разловци.
– Не постои поголема радост на годишнината од Разловечкото востание, да го имаме стартот на работите за реконструкција на прокривот на објектот кој е дело на славниот архитект Ѓорѓи Константиновски, кој почина минатата година, така што ова е еден вид комеморација и почит на неговото дело, но и по долгогодишната запоставеност на овој значаен спомен-дом, конечно, ја започнуваме реконструкцијата. Очекуваме во следните фази во наредните години, еве за 150- годишнината, да го имаме целиот дом реконструирано во неговата изворна смисла, затоа што има неверојатна вредност и затоа што е исто онолку легендарен, колку што е легендарно и самото село и е своевидна реплика и креација на автентичната архитектура која во ова село е добро сочувана, рече Алаѓозовски.
Тој додаде дека уште во 2017 г., Владата согледала дека преку 80 објекти на постојните центри на културата и домовите на култура биле запоставени при што е напарвен план за инвестирање започнувајќи од најзагрозените.
– Како Влада ние не инвестираме во стиропор, непродуктивни споменици, не инвестираме само во центарот на Скопје , туку секаде каде што треба. Ова место е легендарно, тоа е во самиот корен и идентитет и нè прави горди Македонци, рече Алаѓозовски.
Проценета вредност на Договорот за јавна набавка за санација на кровната конструкција на спомен-домот во Разловци е 435.568,00 денари без вклучен ДДВ, а инвеститор е Министерството за култура.
Спомен-домот посветен на Разловечкото востание долги години беше оставен на забот на времето, а состојбата со објектот беше кататстрофална. Спомен- домот е уникатно архитектонско дело на архитектот, проф.д-р Ѓорѓи Константиновски, кој во 1980 ја освои и првата награда за архитектонско решение на весникот „Борба“ на ниво на СФРЈ и на уникатен начин го чува споменот на првото вооружено востание на македонскиот народ за ослободување од Отоманската Империја.
